გაზეთის სანახავად მიყევით ბმულს:
აპრილის ნომერი
აპრილი განსაკუთრებული თვეა, გაზაფხულის შუაგულია, ჩემთვის სწორედ აპრილში მთავრდება ზამთარი და იწყება ახალი სიცოცხლე, სწორედ ამ პერიოდში იჟღინთება ქალაქი ჩემთვის საყვარელი ერთადერთი ყვავილის, იასამნის სურნელით, თითქოს ხალხსაც ეტყობა ეს. სხვა არ ვიცი, მაგრამ ჩემში ნამდვილად ტრიალებს იასამნის სურნელი. ვერ შეგპირდებით, რომ მსოფლიოს მოვლენები აპრილისა და იასამნისთვის დამახასიათებელი ფერებითაა სავსე, თუმცა მე ნამდვილად ვერ ვიტყოდი უარს ამ სიახლეების წაკითხვაზე.
პირველ რიგში, ყველას ძალიან დიდი მადლობა, ვინც გამოხატა თავისი აზრი წინა ნომერთან დაკავშირებით, განსაკუთრებული მადლობა მინდა გადავუხადო ჩვენს ერთ-ერთ დელეგატს, რომელმაც მითხრა, რომ დილით ყავას სვამდა და გაზეთს კითხულობდა, ყველაზე საწყენი მისთვის ის იყო, რომ სტატიები ყავაზე ადრე დამთავრდა და ამას დიდი აღტაცებით მიყვებოდა. ეს ნიშნავს, რომ ჩვენი მიზანი მიღწეულია, იდეამ გაამართლა და ალბათ მართლა შევძელით საინტერესო ინფორმაცია მოკლედ და მარტივად გადმოგვეცა.
რაც შეეხება ამ ნომერს, უნდა ითქვას, რომ არანაკლებ მნიშვნელოვანი მოვლენებია ასახული. არც კი ვიცი, რომელი უფრო მწვავე და აქტუალურია. ალბათ საკმარისია ორი მაგალითის მოყვანა, საპრეზიდენტო არჩევნები ამერიკაში და ნატოს ქმედუნარიანობის ეჭვქვეშ დაყენება. თქვენც ხვდებით, რომ ეს თემები ძალიან მნიშვნელოვანია თანამედროვე მსოფლიოსთვის და რაც მთავარია პირდაპირ თუ ირიბად უკავშირდება საქართველოს, ამდენად, ვფიქრობ არც ეს ნომერი იქნება წარუმატებელი.
თქვენ პირველად იხილავთ მკითხველის გვერდს, ამჯერად გთავაზობთ “თავისუფალი პარლამენტის” აქტიური დელეგატის ნინო კვეტენაძის სტატიას. შეგახსენებთ, რომ ნებისმიერ მსურველს აქვს შანსი გამოგზავნოს თავისი სტატია, რომელიც უნდა ეხებოდეს აქტუალურ თემას, ჩვენ კი აუცილებლად გამოვაქვეყნებთ. გაზეთს ვაწვდით 500-მდე დაინტერესებულ პირს, რაც არც თუ ისე ცოტაა.
ბოლოს კი მინდა აღვნიშნო, რომ აპრილი საკმაოდ დატვირთული თვეა “თავისუფალი პარლამენტისათვის.” 28-29 აპრილს გაიმართება მეხუთე სესია, განახლებული ფორმატითა და საინტერესო თემებით. თვალი ადევნეთ ჩვენს Facebook-ის გვერდსა და ბლოგს (www.freeparliament.blogspot.com ). აპლიკაცია სულ მალე დაიდება. წინ ძალიან ინფორმატიული ორი დღე გველოდება.
შემდეგი ნომერი კი ატმის ყვავილისფერ მაისში გამოვა, მანამდე დატკბით იასამნის სურნელითა და გაზაფხულის სითბოთი.
პატივისცემით,
ნიკოლოზ ჩარკვიანი
