ბოლო დღე ვარშავაში - 8 ნოემბერი

მტრედისფრად ინათა ვარშავაში. მთელი ღამის განმავლობაში წვიმის წვეთები განუწყვეტლივ რაკუნობდნენ ფანჯრის რაფებზე. ეს გარემო თითოეული ჩვენგანისთვის კიდევ უფრო გაუსაძლისსა და საზარელს ხდიდა დილით ადრე ადგომას, მიუხედავად იმისა, რომ დამქანცველი საღამოს შემდეგ, ყველანი შეგუებული ვიყავით იმ აზრს, რომ დილის 9 სთ-ზე ყველანი ფოიეში უნდა შევკრებილიყავით ჩვენი ბარგი-ბარხანითა და ხელჩანთებით ხელში, რადგან კრაკოვისკენ მიმავალი მატარებელი 10 სთ-ზე გადიოდა. ასე რომ, ყველამ ჩვენს თავზე ავიღეთ პასუხისმგებლობა იმისა, რომ ერთი კონკრეტული დელეგატის უპუნქტუალობის გამო მთელ დელეგაციას არ მოუწევდა ლოდინი. 

დილის სურათი ასეთია: გამოუძინებელი სახეები, დასიებულ-დაწითლებული თვალები და უამრავი სხვა მახასიათებლები, რომლებიც მეტ-ნაკლებად ადამიანურ სახეს გვიკარგავდა. ფოიეში ყველანი დროულად გამოვცხადდით, ამ ფაქტით გახარებული ჩვენი არაჩვეულებრივი მასპინძლები, წინ გაგვიძღვნენ. ჩვენ ჩანთებს ხელი ჩავავლეთ და ხმაურითა და დიდი ჟრიამულით გავემართეთ გასასველი კარისაკენ და ჰოი, საოცრებავ, ნისლში ჩაძირული ქალაქი, წვიმისთვის დამახასიათებელი სპეციფიური სუნით გაჟღენთილი ქუჩები, სახე საითაც არ უნდა მიაბრუნო, მაინც იდუმალი ეგოთი ხვდები, თუ როგორ დაგცქერის თავზე ბურუსში გახვეული ვარშავის ყველაზე მაღალი შენობა, კულტურისა და მეცნიერების სახლი. ამ დროს ინსტიქტურად ყველამ ფოტოაპარატები და მობილური ტელეფონები მოვიმარჯვეთ, რათა აღგვებეჭდა  ის სილამაზე, რომელიც ჩვენს თვალწინ გადაშლილიყო. 

როცა ფოტოების გადაღებას მოვრჩით, სადგურისკენ დავიძარით, დაახლოებით 15 წუთში მატარებლის წინ აღმოვჩნდით, დიდი ვაი-ვაგლახით მოვახერხეთ მატარებელში მოთავსება, უბილეთო მგზავრებსა და  დაუპატიჟებელ სტუმრებს ჩვენი კუთვნილი ადგილები დაეკავებინათ, მაგრამ ეს პრობლემა ორგანიზატორების დახმარებით მალევე მოგვარდა. მე ჩემს საყვარელ ადგილზე ღია სარკმელთან მოვკალათდი და ჰორიზონტების ათვისება დავიწყე. სიყვითლე, სიყვითლე, ირგვლივ! ჯარად ჩაწყობილი ულამაზესი ფორმისა და ზომის ხეები, დამუშავებული და დაუმუშავებელი მიწების თვალუწვდენელი მწკრივები, რომლებზეც ბალახს ეს-ესაა ამოეწვერა და ისე ხასხასებდა, ნებისმიერ მნახველს ეგონებოდა ფლომასტრით აფერადებენო.

გზას ვარშავადან კრაკოვამდე დაახლოებით 4 საათი დასჭირდა, როგორც კი სადგურში მატარებელი შევიდა, მალევე ჩამოვბარგდით და ჰოსტელისკენ გავემართეთ, ჩანთები უმისამართოდ შევყარეთ ოთახში და სასადილოდ გავემართეთ ახლომდებარე რესტორანში. რესტორნისკენ მიმავლებს  კრაკოვის ცენტრის გადაკვეთა მოგვიწია, სადაც  თვალში მოგვხვდა ქართული რესტორანი, რომელიც ხალხით იყო გადაჭედილი. ჩვენ თვალწინ აღიმართა უძველესი შენობები და სასახლეები და შემდეგი სიტყვები აღმოგვხდა თითოეული ჩვენგანგანს: "აი, ეს მესის!", " ღმერთო ჩემო, რა სილამაზეა!", "ვაიმე!"  

მალე  რესტორანში აღმოვჩნდით, სადაც ტრადიციული პოლონური კერძები დავაგემოვნეთ, შემდეგ კი გეგმაში ქალაქის დათვალიერება იყო, გიდი, რომელიც უცნობ ქუჩებში წინ მიგვიძღვოდა არაჩვეულებრივი მოსაუბრე აღმოჩნდა, მის მიერ მოყოლილი ისტორიები  იმდენად საინტერესო იყო, არავის მოსვლია აზრად, ერთი სიტყვაც კი ყურებს მიღმა გაეშვა. 

როდესაც სითი-ტურს მოვრჩით, ჩვენთვის სიურპრიზი იყო დაგეგმილი, რომლის შესახებ არავინ არაფერი ვიცოდით, ვიდექით გაჩერებაზე და ველოდით რაღაც ამოუცნობს. სწორედ ამ დროს ჩვენ წინ გაჩერდა ტრამვაი, რომელიც შიგნიდან ლურჯ, წითელ და მწვანე ფერებში ციმციმებდა, ორგანიზატორებმა შიგნით შესვლისკენ მოგვიწოდეს, ჩვენც მალევა შიგნით აღმოვჩნდით და ტრამვაიც დაიძრა. ის ჩვენთვის უცნობი მიმართულებით მიდიოდა ჩვენ კი სასიამოვნო მუსიკას ვუსმენდით, ცოტ-ცოტას ვსვამდით, მონაწილეები ერთმანეთს კიდევ უფრო კარგად ვიცნობდით, ვუახლოვდებოდით და ამასთანავე ქალაქს ვათვალიერებდით. გადავიღეთ უამრავი ფოტო, რომელიც ამ დაუვიწყარი დღის დასტური იქნება მომავალში.

ვარშავა - 7 ნოემბერი

ერთ-ერთი მთავარი მიზეზი, რის გამოც კონფერენციებში მონაწილეობა მიყვარს - ეს სალექციო ნაწილია, რომელზეც კონკრეტული დარგის სპეციალისტები საკუთარ გამოცდილებას უზიარებენ მსმენელებს. ასეთი შეხვედრა შედგა სამუშაო იარაღებისა და ხელსაწყოების მწარმოებელი კომპანია Topex-ის მარკეტინგის მენეჯერთან. გამოწვევა მდგომარეობდა მარკეტინგისა და გაყიდვების დეპარტამენტებს შორის აზრთა სხვადასხვაობის ფონზე კომპანიის წინსვლის უზრუნველყოფაში. სპიკერმა კარგად დაგვანახა ის, თუ რა წარმოშობს ამ შეუთანხმებლობას: ერთის მხრივ, მარკეტინგის დეპარტამენტი გრძელვადიან შედეგზეა ორიენტირებული თავისი კამპანიით, იმ დროს, როდესაც გაყიდვების წარმომადგენლები მოკლევადიან შედეგზე ზრუნავენ და უმთავრესად გეგმის შესრულებით არიან დაინტერესებულნი. სწორედ ამ ორი მიმართულების კოორდინირებაზე  ზრუნავს trade marketing და ეს სირთულე იდგა Topex-ის წინაშეც. ლექციაზე გავიგეთ ის, თუ რა კამპანიები დაგეგმა და განახორციელა ორგანიზაციამ და რა შედეგები იქონია ამან მის ფინანსურ მაჩვენებლებსა და მომხმარებელთა ცნობიერებაზე. ლექციის დასრულების შემდეგ, გვქონდა საშუალება კითხვები დაგვესვა  სპიკერისთვის და კიდევ უფრო მეტი გაგვეგო იმაზე, რამაც განსაკუთრებულად დაგვაინტერესა.

მცირე შესვენების შემდეგ დაიწყო მეორე, არანაკლებ დასამახსოვრებელი ლექცია, რომელსაც საერთაშორისო კომპანია Procter & Gamble-ის წარმომადგენლები წარუძღვნენ. პოლონეთის დეპარტამენტის მარკეტინგის მენეჯერმა მოგვიყვა ის, თუ როგორ აშენებენ P&G-ის სახით ბრენდს, რომელიც მომხმარებლებს უყვართ. განსაკუთრებულად საინტერესოა ის ასპექტი, რომ აღნიშნული კომპანია არ აწარმოებს ისეთ პროდუქტებს, რომლებიც მომხმარებლის განსაკუთრებული სიყვარულით გამოირჩევიან, მაგალითად ტანსაცმელს, ტექნიკას ან მანქანებს. ამის საპირისპიროდ, P&G ისეთ სფეროში მოღვაწეობს, რომელშიც სხვადასხვა ბრენდის პროდუქტი ძალიან ჰგავს ერთმანეთს მომხმარებლისათვის მინიჭებული სარგებლის თვალსაზრისით. ზუსტად ამიტომ, მარკეტინგის დეპარტამენტის ამოცანაა მყიდველს ბრენდი შეაყვაროს და ალტერნატივებზე ფიქრის ნაცვლად, პროდუქტის საჭიროების დროს ერთადერთი კომპანია გაახსენოს. ვნახეთ რამდენიმე ძალიან ეფექტური და ამავდროულად სახალისო სარეკლამო ვიდეორგოლი, და გავეცანით მათი შექმნისას გამოყენებულ სამუშაო პირამიდას. ვორქშოპის დროს დასმულ კითხვებზე სწორი პასუხისას სპიკერი P&G-ის პროდუქციით აჯილდოვებდა მონაწილეებს და ქართული დელეგაციის წარმომადგენლებს არაერთი პრიზი გვერგო. დასასრულს, ადამიანური რესურსების მენეჯერმა, ორგანიზაციაში დასაქმების რეალურ პერსპექტივებზე გვესაუბრა და ონლაინ განაცხადის შევსება შემოგვთვაზა. ლექციის დამთავრების შემდეგ კითხვარები დაგვირიგეს, რომლითაც ჩვენი აზრის გაგება სურდათ ჩატარებული ვორქშოპის შესახებ. ამან კიდევ ერთხელ დაგვარწმუნა იმაში, თუ რამდენად მნიშვნელოვანია წარმატებული კომპანიებისთვის მომხმარებლებისა და ზოგადად დაინტერესებული პირების მოსაზრებები.

სადილისა და მცირე დასვენების შემდეგ, გაუარესებულმა ამინდმა, საბედნიეროდ, ხელი არ შეგვიშალა ე.წ „ქალაქში თამაშისაგან“, რაც ერთ-ერთი ყველაზე დასამახსოვრებელი აქტივობა აღმოჩნდა მთელი ვიზიტის განმავლობაში. კონფერენციის მონაწილეები 5 კაციან ჯგუფებად დავიყავით. ორგანიზატორებმა თითოეულ ჯგუფს თითო კოორდინატორი მოგვამაგრეს, ქალაქის რუკა მოგვცეს, რომელზეც დანიშნულების ადგილები იყო აღნიშნული და მათ შესასრულებლად გაგვაგზავნეს. პირველი დავალება იყო 3 პოლონური ენის გასატეხის დამახსოვრება და რომელიმე ადგილობრივისთვის მათი დაწერის თხოვნა. პატარა ხერხს მივმართეთ და ენის გასატეხები ტელეფონში ჩავიწერეთ, რის გამოც პირველი დაბრკოლების შესრულება არ გაგვჭირვებია. მეორე დავალების დროს ჩვენი პოლონელი კოორდინატორის სახე ფერადი საღებავებით მოვხატეთ. მესამეზე საოცარი ფიგურები წარმოვადგინეთ - მაგალითად შევძელით 5 ადამიანისგან შემდგარ ჯგუფში დავმდგარიყავით ისე, რომ მიწას მხოლოდ 3 ფეხი და 2 ხელი დაყრდნობოდა. მეოთხეზე უკვე სიცილით შემოვატარეთ თვალახვეული ნიკა ვარშავის მეფის ძეგლს კოვზზე დადებული კვერცხით ხელში. მეხუთეზე ბევრი ვიფიქრეთ კოდირებული ფრაზა რომ ამოგვეკითხა, და ბოლოს უკვე გვანცას მივანდეთ ჩამოწერილ სიტყვებზე სიმღერის იმპროვიზაცია.

დღე ფინალური ბანკეტით დამთავრდა, სადაც საზეიმოდ გადმოგვეცა კონფერენციაში მონაწილეობის დამადასტურებელი სერტიფიკატები და პოლონური სუვენირები. სალექციო ნაწილის დამთავრება შამპანურით და ფურშეტით აღვნიშნეთ. სიურპრიზი იყო ტორტი, რომელზეც კონფერენციის ფოტოები იყო გამოსახული. ბევრი ფოტო გადავიღეთ, ერთმანეთს შთაბეჭდილებები გავუზიარეთ და დღე კლუბში განტვირთვით დავამთავრეთ.

ვარშავა - 6 ნოემბერი

კონფერენციის მეორე დღე ჰოსტელში საუზმით დაიწყო. წინა ღამის კლუბური გართობის შემდეგ საკმაოდ რთული აღმოჩნდა დილით ადრე ადგომა.

უნივერსიტეტში ვიზიტამდე მასპინძელმა ორგანიზატორებმა ვარშავის ყველაზე მაღალ შენობაში - კულტურისა და მეცნიერების ცენტრში წაგვიყვანეს. შენობიდან იშლება ხედი მთელ ქალაქზე. ხედი საკმაოდ კონტრასტულია - ცათამბჯენებსა და ინდუსტრიულ ცენტრებთან ერთად მოჩანს რესტავრირებული ძველი ქალაქი, რომელიც გაშენებულია მდინარე ვისლას ნაპირზე.

უნივერსიტეტში 2 ლექცია ჩატარდა, რა თქმა უნდა ისევ მარკეტინგის თემატიკაზე. პირველი ლექცია შეეხებოდა "ადგილის მენეჯმენტს" - ათენის ოლიმპიადის მაგალითზე გავარჩიეთ სტრატეგია, რომელიც ქვეყანამ უნდა დასახოს იმისათვის, რომ კონკრეტული ტურისტული მდებარეობა პოპულარული გახდეს ან შეიცვალოს მსოფლიოს დამოკიდებულება მის მიმართ.

მეორე ლექციის თემა იყო რებრენდინგი - როგორ უნდა მოხდეს ბრენდის შეცვლა ნეგატიური შედეგების გარეშე. აღსანიშნავია ისიც, რომ ლექციებს არა ლექტორები, არამედ პრაქტიკოსი ბიზნესმენები გვიტარებდნენ და მათი ლექციები რეალურ გამოცდილებაზე იყო დამყარებული.

ლექციების შემდეგ წავედით უნივერსიტეტის ერთ-ერთი შენობის კაფეტერიაში, სადაც პოლონური ნაციონალური კერძები დავაგემოვნეთ.

დაახლოებით 4 საათისთვის უკვე ჩამობნელდა და ჯგუფი ქალაქის ძველ ნაწილის დასათვალიერებლად წაგვიყვანეს. ჩვენი გიდი ძალიან საინტერესო ადამიანი აღმოჩნდა. საკმაოდ საინტერესო ტექსტებით, რომელიც შეჯერებული იყო იუმორით, საკმაოდ ბევრი რამ გავიგეთ ვარშავის შესახებ. როგორც მოგეხსენებათ, მეორე მსოფლიო ომის დროს ქალაქის 90% დაინგრა. მართლაც საოცარია, როგორ მოახერხეს ქალაქი ასე კარგად აღედგინათ სულ რაღაც 7 წელში. დაცულია სტილი და ამავდროულად შენობებისთვის მიცემულია სიძველის ეფექტი. ექსკურსიის შემდეგ დავაგემოვნეთ ყველაზე პოპულარული პოლონური კერძი "პიეროგი" - ვარენიკები განსხვავებული შიგთავსით.

როგორც ყოველი დღე, ესეც სავსე გახლდათ გასართობებით - ჰოსტელთან ახლოს მდებარე პაბში დაღლილობა პოლონური ლუდით განვიქარვეთ.

პირველი დღე ვარშავაში - 5 ნოემბერი

ვარშავის აეროპორტში გამთენიისას ჩასულებს, ორგანიზატორები დაგვხვდნენ და წაგვიყვანეს ჰოსტელში, სადაც დანარჩენი მონაწილეები უკვე შეკრებილიყვნენ სხვადასხვა ქვეყნებიდან. ჰოსტელში განთავსების შემდეგ წავედით "ვარშავის ეკონომიკის სკოლაში". 

პირველი ვორქშოფი ჩაატარა "ბენესო"-ს წარმომადგენელმა. სტარტაპ ბიზნესის სხვადასხვა ფაზებზე 15 წუთიამი მოხსენების შემდეგ, 4-4 კაციანმა ჯგუფებმა საპრეზენტაციოდ მოვამზადეთ ჩვენი ბიზნეს იდეა.

ვორქშოფის შემდეგ ლექცია წაიკითხეს "Saatchi&Saatchi"-ის მარკეტოლოგებმა, რომლებმაც მარკეტინგის ისტორია მიმოიხილეს, გაგვაცნეს არაერთი საინტერესო მაგალითი.

ლანჩის შემდეგ მოვინახულეთ ვარშავის მეცნიერების ცენტრი, სადაც საკუთარი ხელით შეგიძლია ჩაატარო ფიზიკური კანონების საილუსტრაციო საინტერესო ექსპერიმენტები.

საღამოს დაგეგმილი იყო პირველი წვეულება ვარშავის ერთ-ერთ კლუბში. წვეულებაზე მონაწილეები და პოლონელი ორგანიზატორები უკეთ გავიცანით. კლუბიდან გვიან დაბრუნებულები უკვე შემდეგ დღეზე ვფიქრობდით.